praktikak egin ditudan ikastolako web gunea hau da, nahi baduzue sartu…

http://www.haztegi-ikastola.net/web/default.php

3. mintegirako lana: sekuentzia didaktikoa

Praktikak egiten hari naizen ikastola honetan, orain arte eta beti esan dudan bezala, ikaskuntza testu liburuetara murrizten zen eta hura lehenbailehen bukatzea zen irakaslearen helburu nagusia. Egunak aurrera egin ahala, gauzak aldatzen joan dira.

Irakaslearekin behin baino gehiagotan hitz egiteko aukera izan dut eta berak galdetzen zidan ea gelako saioak nik uste bezalakoak ziren. Nik erantzun nion HUHEZI-n bultzatzen duguna eskola eraikitzailea dela eta horretarako testu-liburuak ez direla zehatz-mehatz jarraitu behar. Irakasleak nire jarrera ulertzeko arazorik ez zuen izan baina irakasle bakarrarekin beste motatako ariketak aurrera eramatea zaila dela ere esan zidan. Bion artean ados jarri ginen eta testu liburuekin lotutako ariketak beste era batera antolatu genituen, jarraian azalduko dudana.

Sekuentzia didaktikoarekin hasteko, Ikasleei esan genien Txanela proiektuko denboraren makina, hau da gaiez aldatzeko erabiltzen duten aitzakia, matxuratu egin zela eta hau konpontzeko mekanikariarengana joan behar ginela.

Ideia hori erabili genuen, ikastolan aurten lanbide ezberdinetaz mozorrotu garelako, era batean lanbide mota ezberdinak ezagutzeko eta inauteri ezberdinak ezagutzeko.

Arloak:
- Matematika (ibaizabal liburua jarraitzen dute, eta ez du loturarik besteekin)
- Gaztelania (fitxa asko egiten dituzte ortografiarekin lotuta)
- Musika (abestiak abestu eta ipuin ezberdinak kontatu musikarekin)
- Ingelesa (Hocus & Lotus proiektua)
- Soinketa (talde dinamikako jolas ezberdinen ondoren, inauterietako dantzak praktikatzen genituen)
- Inauteri-lanbideen gaia
- Informatika (birziklapenaren inguruan SASIETAk sortutako joko batekin jolasten zuten, edo informazioa bilatu ondoren horrekin lan egiteko)
- Plastika (materialak berrerabili dituzte eskulanak egiteko, bakoitza bere kasa imajinazioa sustatuz)

Beraz esan dezakegu, arloen artean ez dagoela erlazio handirik eta ez dagoela diziplinartekotasunik. Soilik, informatikarekin eta plastikarekin.

Landutako edukiak hauek izan dira:
- Neguko festak
- Inauteriak
- Lanbideak
- Lanbideek eskaintzen diguten produktu eta zerbitzu ezberdinak
- Produktuen ekoizpen prozesua
- Produktuen azterketa
- Produktuen erabilpenaren ostean sortutako hondakinak
- Hondakinak birziklatu

- Euskarari dagokionez: hitz potoloagoen erabilpena (produktu, birziklapen, zikliko, fabrika…

Zehar lerroak:
- giza eskubideak
- harremanak
- bake hezkuntza
- ingurumena
- Euskal Dimentsioa sustatu: Euskal kulturaren berri eman, inauteri ezberdinak ezagutuz

Helburuak:
- Edukiak funtzionalak izatea
- Entretenigarriagoa izatea, hau izan baita batik bat aldaketaren beharra
- Metodologia berritzea
- Autonomia
- Talde lana bultzatu
- Erabateko parte hartzea

Jarduerak:
- Bisitetarako galdeketak prestatu
- Binaka euskal inauterietako pertsonai bat aukeratu ondoren (Mielotxin, Ziripot, Zaldiko…) informazioa bilatu eta definioak prestatu. Ondoren erakusketa txiki bat egiteko.
- Gustuko lanbidea aukeratu eta presentazioa bideoz grabatu.
- Produktuak ekarri eta azterketa fitxak bete.
- Artelan bat egin materiala berrerabiliz.

Estrategia metodologikoak:

- loturak egitea inguruarekin. Esaterako, Legazpiko dantza talde bat urtero inauterietako igandean euskal inauterietako gai batez mozorrotzen dira. Ikasle asko dantzara doaz edo besteak ikustera joaten dira, beraz interesa sortzen zaie.
- Aurrezagutzetatik abiatu.
- Bisitak egin eta gelara bisitak ekarri. Gu suhiltzailez mozorrotu behar ginenez suhiltzaile bat etorri zen gelara eta ondoko gelakoak lorazainez mozorrotu behar direnez lore dendara egin genuen bisita.
- Abestiak eta dantzak sartu.

Ikasleen antolaketa eta taldekatzeak:

- “U” itxurako antolamenduan daude eserita, arbelari eta irakasleari begira. Hala ere, irakaslea oso gutxitan egoten da mahaian eserita. Oso esanguratsua eta baliagarria iruditzen zait irakaslea ikasleen artean murgiltzea, hau da, irakasle eta ikasleen arteko erlazio bertikala saihesten duelako.

- Lan gehienak taldean egiten dituzte, batik bat binaka. Taldeak edo bikoteak sarritan aldatzen du irakasleak. Aldaketa hauek, zozketaren eskuetan utzi beharrean, irakasleak bere modura egiten ditu. Gelako aniztasuna kontutan hartzen du taldeak egiterako orduan: motelena azkarrago doan batekin jartzen du (beraien artean elkarrekintza sustatzeko), berritsuenak inoiz ez ditu batera jartzen, alperrak beti batera egoten dira (behintzat horrela zerbait egiten dutela ziurtatzen da)…

Denboralizazioa:
- Ordutegi bat izan arren, ez ditu saioen ordena zehatz-mehatz jarraitzen. Tinko mantentzen diren saio bakarrak musika, ingles, soinketa eta jolas-ordua dira.
- Ikasleen interesen, jarrera, egoera emozionalak eta abarren arabera modu bateko edo besteko ariketak planteatzen ditu. Gehienez, saioak 45 minutukoak izaten dira.

Espazioa:
- Saioak gehienetan gelan bertan egiten dira, soinketa, musika, informatika, ingles eta igeriketa izan ezik.

Material eta baliabide kurrikularrak:

- Irakurketa txokoan, mota guztietako liburuak aurki daitezke ( handiz edo txikiz idatzita, asmakizunak, aniztasunaren araberako liburu “bereziak”…)
- Jolasen txokoan material ugari eta funtzionalak topa ditzakegu, denak taldeka jolastekoak direlarik.
- Teknologia berriei erabat zabalik ditu ateak. Informatika gela, fotokopiadora gela, fax eta telefonoa, bide-gela, teknologia gela eta abarrez gain, ikasgela bakoitzak ordenagailu bat edo gehiagorekin lanean dihardu; baita kainoia eta honen imajinak ahalik eta hoberen ikusteko pantaila.

- Musika gelan musika tresna ezberdinak batez ere perkusiozkoak.

- Soinketarako material ugari, edozein kirol praktikatzeko materiala (beisbol, hockey, indiakak, era guztietako baloia, zestan jolasteko… )

Ebaluazioa:

- Prozesuaren jarraipena ematen da ikasle hauen ebaluaketan. Ibilbidearen eta lehen aipatutako helburuen balorazioa egiten da “gaizki egiten dutena” “hobetzeko lanetan” bihurtuz.
- Egindako gauza guztiak eguneroko batean idazten du irakasleak. Baita, norbait beste norbaitekin haserretu bada ere. Egin gabe gelditu diren ariketak apuntatzen ditu beste batean. Azkenik, jarrerak eta zailtasunak beste batean.
- Ondoren asterokoak idazten ditu pertsona bakoitzeko.
- Arazorik ez badago edo zerbait espeziala gertatzen ez bada, gurasoekin hiru hilabetera biltzen da eta pertsonalki nola joan diren gauzak kontatzen dizkie.
- Hala ere, lotura zuzena du guraso guztiekin eta egunero, kalera irteten da gurasoekin pixka bat hitz egitera.

Irakaslea banintz…

- Arloen arteko erlazio handiagoa sustatuko nuke.
- Matematikan buruketak beste modu batera planteatu nituzke, lantzen hari garen gaiarekin lotutakoa proposatu.
- Gaztelanian ortografia ere landuko nuke, baina beste gai honekin lotutako hitzak eta istorioak erabiliz.

Bestalde, irakasleak nirekin izan duen jarrera bikaina deritzot. Bere ikasgaietan pila bat parte hartzen utzi dit, aldaketak egiten, klaseak tarteka ematen, egunerokoa bion artean planteatu dugu… Oso ondo konpondu gara eta asko ikasi dut berarekin.

ihauterik!!!

aurten ihauterietan ikastolan lanbide ezberdinetaz mozorrotu gara. Gure gelakoak suhiltzailez mozorrotu gara, argazkikoak nire ikalseak dira.

Ihauteri hauek zirela eta unitate didaktiko bat jarri genuen martxan, 3. mintegirako egindako lanean azaltzen dena.

2. mintegirako lana: elkarrekintza eta harremanak

Praktikak egiten hari naizen 2. mailako gela honetan, orokorrean, ematen diren elkarrekintzak egokiak dira.
Hasteko ikasleen artean, denak orokorrean oso ondo konpontzen dira. Tira bira batzuk izaten dituzte noizbehinka jolasetan agian, baina bestela, lan orduan batez ere oso ondo funtzionatzen dute. Talde lan asko egiten dituzte, batez ere binaka eta ez dute preferentziarik izaten inorekin izateko, salbuespenak salbuespen. Aurrekoan aipatu nuen bezala, talde honetan ikasle berezi bat dago (Magda), honekin batzuetan arazoak izaten dituzte. Hau batzuetan asko aztoratzen baita eta besteei jo egiten die.Bestela, Magda asko errespetatzen dute, badakite ez duela beraien maila berdina eta horregatik gauza batzuk ere onartu egin behar zaizkiola eta batez ere lagundu.
Beste datu bat aipatzekoa, hiru ikasle (Xabi, Andoni eta Erik) elkartzen direnean ez dute lanik egiten, buila asko egiten dute eta irakasleari kasu gutxi egin. Horregatik, irakaslea saiatzen da hauek ez daitezen egon batera lana egiteko orduan, eta jolas orduan esaterako pixka bat gainean egon ez dezaten inor baztertu.

Irakasleari bestalde, ikasle guztiek errespetu handia diote. Irakasleak esandakoa ondo betetzen dute eta aurreko batean aipatu nuen bezala, ikasleek asko maite dute.

Ikasleen eta nire arteko erlazioa ezberdina da. Herak ez naute irakasle bezala ikusten, esaterako egun batean ikasle batek esan zion tutoreari “ Andereño Nerea, bueno andereño ez laguntzaile…” Horrez gain ere, soinketa saioetan ere nik beraiekin jolastea nahi dute edo ez dute ulertzen zergatik nik ez ditudan ariketak egiten. Irakaslea pentsatzeko era hori saihesten saiatzen da, irakasleak esaten die ni irakasle izateko ikasten hari naizela eta momentu honetan irakasle lanak egin behar ditudala, beraz errespetu berdina izan behar didatela. Hori ere beste kontu bat da, ez nautenez irakasle bezala ikusten ez didate kasu askorik egiten, baina hori pixkanaka ere ekiditen hari gara. Denbora aurrera doan heinean errespetu gehiago didate eta askoz ere distanteago daude nirekin. Lehen edozein tokitara joaterakoan niri eskua emateko borrokatu egiten ziren, orain ordea ez; baina nik emandako aginduak bete egiten dituzte.

Gure gelan, irakasleak du iniziatiba handiena berak antolatzen ditu klaseak eta berak ematen ditu ideia berriak. Baina hala ere, ikasle guztiek parte har dezaten saiatzen gara. Ikasgela guztietan bezala badira hiruzpa lau gehiago parte hartzen dutenak, aipatu beharra dago azken hauek iniziatiba asko dutela eta irakasleak hauen ideiak eginarazten ere saiatzen dela. Atzean geratzen diren horiei berriz, irakasleak motibatu egiten ditu parte hartzeko.
Nire partaidetza gehitzeko, geroz eta handiagoa da, poliki-poliki klase gehiago ematen ditut nik bakarrik. Gainera, agian irakasleak norbaitengana badoa zerbait azaltzera edo gelatik kanpo irten behar badu, nik jarraitzen dut klasearekin. Horrez gain, aurreko batean 1. mailan ordezko egon nintzen.

Gatazken inguruan aipatzekoa da oso ezberdinak direla. Hasteko, ohikoena isiltasun falta da, nahiz eta irakasleak mila aldiz esan isiltzeko beti norbait hitz egiten hasten da. Orduan horri aurre egiteko irakaslea, isilik geratzen da hitz egiten hari den horri begira, orduan ikasleek pertsona horri isiltzeko eskatzen diote eta lanarekin jarraitzen dute. Honekin oso lotuta dagoen bat, izan liteke ikasleak aztoratuta daudenean eta builaka edo zutitzen hasten direnean, momentu horretan irakasleak esaten du berak bakarrik lan egingo duela adi dauden ikasle horiekin. Kasuan, bat bakarrik izaten bada eta besteei lana egiten uzten ez badie, pentsatzeko txokora joateko eskatzen die. Han folio batea idazten dute zer egin duten gaizki eta nola hobetu beharko luketen, konpromiso bat idatziz eta ondoren sinatuz. Errepikatzen bada, irakasleak orria erakusten die.

Beste bat izan liteke, jolas orduan zerbaitegatik haserretu egin direla ikaskide batekin. Momentu horretan, norberak berak zer egin duen kontatzen du bakarrik besteena esan gabe. Ondoren, irakasleak lekukoei entzun ondoren berak nola izan dela uste duena kontatzen du eta bestei gauzak gehitzeko aukera ematen die. Honen ondoren, barkamena eskatzen dute elkar eta ez dela errepikatzeko asmotan, ikaslea triste bezala jartzen da beraien aurrean esanez hori ez zaiola batere gustatu.

Ikusten dudanez, ematen diren esku hartzeak ez doaz okerreko bidetik, iruditzen zait esanguratsua dela beraientzat. Gainera, momentuz ez da inor gelatik kanpo irten edo klase amaieran inor geratu.

Nire ustez, irakasleak erabiltzen dituen estrategiak elkarrekintzan eta harremanetan egokiak dira. Ideia batzuk eman dizkit horrelakoetan nola jokatzeko. Gainera, ikasleen gurasoekin lotura estua duenez, asko hitz egiten die harremanen inguruan; edozertarako ere psikologo bat dute ikastolan, kasuan kasu norbait baztertzen badute edo.

gure gela

Haztegi Ikastolako irakaskuntza nahiko tradizionala da, aurreko astelehenean beste eskolak nolakoak diren ikusi ondoren.

Nik irakasleari galdetu nion ea zergaitik eramaten zuten ikaskuntza prozesu hori eta ea ez duten pentsatu aldaketa eraikitzaileak egitea. Berak erantzun zidan 2 urtetan egin zutela proba, eta ondo joan zela funtzionala zela, baina nahiago dutela liburuak erabiltzea eta modu honetan lan egitea.

TXOKOAK!

1. pentsatzeko txokoa: gaizki portatzen direnean, zigortu ordez, mahai honetan eseritzen dira egin dutenaren inguruan pentsatzeko.

2. Txoko zuria: Txanela proiektuan lantzen hari diren gaiaren arabera, etxean horrekin lotuta dauzkaten gauzak ekartzen dituzte.

3. Jolasen txokoa

4. liburutegi txokoa: ostiraletan bakoitzak liburu bat etxera eramaten du, astelehenerako irakurtzeko.

1. mintegiarako lana: ikaste-irakaste prozesua IHPan

Ikastetxearen ezaugarriak:

Nik aukeratu dudan eskola praktikak egiteko, Haztegi Ikastola, Legazpin dago kokatuta. Herri hau, Urola garaian dago, zehazki Zumarraga eta Oñatiren artean eta gaur egun, 9000 biztanle inguru ditu. Bertan dauden industria handiengatik oso garrantzitsua izan zen garai batean, eta horren eraginez, Extremadura eta Galiziatik jende asko etorri zen bertara lanera.
Herrian ematen diren dinamikak positiboak eta onak izaten direla esan behar da, ondorioz kultur maila eta integrazio maila nahiko ona dela esan genezake. Ospakizun eta ekimenetan parte hartzea nahiko zabala da eta herriak bizirik mantentzeko guraso elkartearekin batera hainbat jaialdi aurrera eramaten dira: danborrada, inauteriak, euskararen eguna, gabonetako ospakizunak…
Hezkuntzaren arloan zentratuz, esan dezakegu bi ikastetxe daudela; publikoa dena Domingo de Agirre eta pribatua dena, Haztegi Ikastola.

Haztegin aukeran dagoen eredu bakarra D eredua da, beraz, eskola publikoan ez bezala, Haztegi Ikastolan euskaraz eskaintzen dira saio guztiak, gaztelerako saioa izan ezik eta ingelerakoa. Honen bidez, hain egoera larrian dagoen euskara bultzatu nahi da.
Haur Hezkuntza, Lehen Hezkuntza, Bigarren Hezkuntza, Derrigorrezko Bigarren Hezkuntza eta Batxilergoa ikasi daiteke bertan. Bi eraikinetan dago banatuta Haztegi, bat Haur Hezkuntzarako eta bestea 1. mailatik batxilergorarte.
Horrez gain, gure ikastetxea nolakoa den ikusteko, kontuan izan behar dira bere nortasun ezaugarriak, hauek direlarik:
Hizkuntza eta kultura
Haztegi Ikastola Euskal Herrian txertatuta dago eta ikastola izaera duelako, gainontzeko herrialde eta herrietako kulturei zabalik egonik, euskara eta euskal kultura bultzatzen ditu.
Euskara izango da irakasle, beste langile eta ikasleen arteko harremanak bideratzeko erabiltzen den hizkuntza bakarra. Gurasoekin ematen diren harremanetan euskarak lehentasuna du.
Ikuspegi honetatik, Haztegi ikastolak ikasleriaren eleaniztasunaren alde apustua egiten du. Bertan Haur Hezkuntzatik hasten dira ingelera ikasten, gaztelera berriz Lehen Hezkuntzako 1.mailatik, Frantsesa ikasteko aukera dute azkenik Derrigorrezko Bigarren Hezkuntzako 1. mailan.

Aniztasuna ideologikoa
Ikastola erakunde pluralista da eta guztion elkarbizitza hobeago baterako, bere inguruan finkaturik dauden ideia politiko, fisiologiko eta erlijioso desberdinekiko errespetu osoa indartuko du.
Politika eta gizarte ardurari dagokionez, guraso, langile eta ikasleek dituzten aukerak errespetatuko dira.
Ikastolak, politika, ekintza kultural gisa adieraziko du eta ez du inoiz proselitismoa suposa dezakeen jarrerarik onartu eta mantenduko.
Erlijioa gauzatzeari dagokionez, guraso, langile eta ikasleen sineskera errespetatuko da. Ikastolak erlijioa kulturazko jarduera gisa adieraziko du eta doktrinamendu arloa, eskolak ekintzetatik kanpo bideratu behar duela ulertzen du.
Gestio era
Ikastolako partaideak: gurasoek, irakasleek, ikasleek eta gainontzeko langileek, denek parte hartu behar dute ikastolaren gestioan eta aktiboki lagundu berorren funtzionamenduan.
Gaur egun, Haztegi Ikastola kooperatiba da eta hori dela eta, guraso batzuk bazkide dira. Kurtso hasieran batzar bat egiten da, eta bertan zortzi guraso aukeratzen dira bazkide horietatik. Horrela, zortzi guraso horiek, irakasle kolaboratzaileak (momentu honetan 4) eta zuzendariak bilerak izaten dituzte, ez bada kasu puntualen bat gertatzen, hilabetean behin. Bilera hauetan gauza ezberdinak erabakitzen dira, eta ondoren gainontzekoei zabaltzen zaie ohar edo bileren bidez.
Bestalde, mailako ordezkariak daude, hauek noizean behin ere, beste era bateko bilerak izaten dituzte gauza ezberdinak erabakitzeko: Euskaraz Bizi, Agenda 21, batzorde pedagogiko, jai batzorde eta abarrekin lotuta.
Metodologia
Ikastolak, ikasleek dituzten gaitasun guztien garapen harmonikoaren bitartez, hezkuntza integrala bilatuko du, gizarteak eskatzen dituen erantzukizunak era baikor eta arduratsuan bete ditzaten.
Haurtzaroko heldu gabezia eta mendekotasunetik abiatuz, gaztaroko heldutasun eta autonomiarantz bideratzeko, ikasleek erabakiak hartzeko ahalmena eta erabaki horien erantzule izateko jarrerak bultzatu dira, oinarri metodologiko hauek kontuan izanik:
- Irakaskuntza ikasleak dituen aurrezagutzetatik abiatuz antolatuko da, honek era esanguratsuan eraiki dezan bere kono-zimendua.
- Ikaslea bera ikasbidearen protagonista aktibotzat hartzen da. Duen ahalmenaren arabera, ikasleak ekintza antolatu eta aurrera eramaten lagunduko du.
- Ikaslea izaki soziala denez, horretara lagunduko duen irakaskuntza bultzatuko da, edozein pertsona integratuz eta onartuz. Ikasleen arteko elkarreraginak duen garrantzia kontuan harturik, egitura kooperatibo batetan antolatuko dira ikaskuntzaren ekintzak. Behar diren bitartekoak jarriko dira sexu, gaitasun, arraza, erlijio, elbarritasun eta barreko ezberdintasunak diskriminazioaren iturri izan ez daitezen.
- Irakaskuntzaren helburua ez da diziplina edo arloa bera izango, errealitatea ezagutu eta bizitzarako prestatzeko baliagarria izango zaigun tresna baizik; horrek, irakasleak helburuetan dituen trebetasunak eta ahalmenak lantzeko bidea emango du, ikasleak hauek bere bizitzan txertatu eta erabiltzeko gai izan daitezen.
Ikastolak zatigaitzat hartzen du eduki kontzeptual, prozedurazko eta jarrerazko irakaskuntza.
Berrikuntza pedagogikoa
Haztegi Ikastolako irakasleen taldean berrikuntza, esperimentazioa eta ikerketa giroa indartuko dira, irakaskuntzaren prozesu guztiak etengabeko hobekuntza bidean egon daitezen.
Gaur egun, proiektu ezberdinetan dihardute, esaterako: formakuntza ikastaroak, mintegiak, berritze guneak… Gehienak federazioak antolatuta.
Kanpo proiekzioa
Ikastolaren izaera eta orientabideak berau kokatuta dagoen gizartean islatzea zainduko da. Hau gauzatu dadin, Haztegi Ikastola inguruko erakunde eta elkarteekin lan egiteko prest agertzen da.
Hasteko, herri mailan: udal foroan parte hartzen du, erreka eta zuhaitz egunean, Agenda 21ekin…
Legazpiko beste ikastetxe publikoarekin harreman zuzena dute jaialdiak prestatzeko garaian, danborrada, inauteriak, Santa Ageda, San Nikolas, gabonetan… gehi beste ekintza puntual asko.
Bestalde, Ertzaintzakoak etortzen dira herrian nola ibili behar dugun irakastera, sasietakoak, Alcolicos Anonimosetik ere, sexualitatearen inguruan Irusta taldea, Legazpiko Gazte txokokoak, Emakundetik…
Ebaluaketa
Ebaluaketa esaten dugunean prozesu hezgarria dugu kontutan; bertan informazioa bildu, datuak aztertu, erizpenak egin eta gomendioak ematen dira gure hezkuntza proiektu guztien bilakaerari buruzko erabakiak hartu ahal izan ditzagun.

Gelako ezaugarriak:
Hasteko gela handia da eta oso ondo egokituta dago.
Sartu eta parera, mahaiak daude U forman bakoitza bere aulkiarekin, eta aurrerago irakaslearen mahaia; honen atzean leihoak parkeari begira.
Eskuinetara arbela dago, bertan beti data idatzita egoten da. Arbelaren gainean erloju bat dago. Honen eskuinetara irakaslearen armairua eta ezkerretara aterkiak uzteko tokia.
Ezkerrean, txokoak ezberdinak daude. Pentsatzeko txokoa batetik, portaera desegokia izaten badute irakasleak, era egokian, egin duenaren inguruan pentsatzera joateko eskatzen dio. Han mahai bat dago ispilu batekin eta denboratxo bat egoten da ikaslea horri batean idazten zer egin duen gaizki eta zein den hartuko duen konpromezua hori hobetzeko.
Bestalde, ondoan armairu bat dago jostailuekin; baloia, soka saltoa, legoak, puzzleak…
Honen jarraian, txoko zuria dago, Txanela proiektuarekin lotuta dago hau. Latzen hari diren gaiarekin lotutako gauzak ekartzen dituzte etxetik eta han uzten dute (bideoak, liburuak, jostailuak…) eta argazkiren bat ekartzen badute justu gainean dagoen kortxoan itsasten dituzte denek ikusteko.
Goiko kortxo honetan, zenbakiak idatziz jarrita daude. Baita zailtasunak duten hitzekin egindako marrazki batzuk; esaterako, trena, grapagailua, bizikleta, kromoa, klariona…
Bukatzeko, atea aurkitzen den paretan, pertxeroa eta liburutegi txikia aurkitzen da.
Ikasleen ezaugarriak:
Nire gelan hemeretzi ikasle ditut 7-8 urtekoak eta gailentzekoa da, daramakidan aste honetan behin bakarrik etorri direla denak. Barizela edo sukarra bezalako gaixotasunak baitaude, eta horrez gain irakaslearen esanetan asko igeriketa dutela jakitean gaixotu egiten dira.. Neska mutilak oso zoragarriak dira eta lehenengo egunetik oso ondo moldatu dira nirekin. Gainera batzuk hasi dira esaten ea zergatik ez naizen etortzen arratsaldeetan, andereño deitzen edo marrazkiak egiten.
Esan beharra dago, gelan badaudela laguntza berezia behar duten bi ikasle. Batetik Magda, oraindik ez diote aurkitu zein izan daitekeen bere atzerapenaren arrazoia. Honek egokitzapena dauka, 9 urterekin (5 urte zituela errepikatu egin zuen) Haur Hezkuntzako helburuak ditu. Egunean ordutxo bat hezitzaile bereziarekin joaten da ariketa ezberdinak egitera. Bestalde, Iosuk, laguntza berezia behar du hizkuntzekin orokorrean eta matematiketan, honi laguntzeko irakasle bat sartzen da astean 3 ordu. Orain ni nagoela gutxiago etortzen da.
Bestalde, bi ikasle etorkin daude gelan. Lehen aipatutakoa, Magda, Poloniatik etorria bere familiarekin; hori dela eta arazoak ditu ere euskararekin. Bishal berriz, Nepaletik etorri zen, Legazpiar batzuk adoptaturik duela urte eta erdi. Honek ez dauka arazorik, alderantziz, oso azkarra da eta beste asko baina hobe egiten du euskaraz.
Horrez gain, oso maila ezberdina dago beraien artean. Aniztasun handia dago gelan. Batzuk fitxa bat 10 minututan bukatzen duten bitartean, beste batzuk ordu osoa behar dute.
Azkenik, ikasleekin bukatzeko, esan beharra dago denak oso ondo konpontzen direla klasean eta ez dela inor baztertzen. Esan nezake guztiz kontrakoa gertatzen dela, zeren nahiz eta ikasle etorkinak egon edo ez gaitasun batzuk dutenak, umeek trataera normala ematen die.
Irakasleen ezaugarriak:
Nire gelako tutorea Arantxa da,eta praktikak hasi nintzen lehenengo egunetik bere jarrera oso ona eta egokia dela iruditu zait. Azpimarratu beharra dago, denak aniztasunez, errespetuz eta maitasunez hartzen dituela eta beraien beharrei erantzuten saiatzen dela. Horretarako bakoitzari behar duen denbora ematen die ariketak edo lanak egiterakoan. Nirekin duen jarrera ere oso ona da eta beti dago gauzak esplikatzen eta laguntzen lasaitasunez.
Baina gauza oso garrantzitsu bat eta aipatu beharrekoa da; gehien arduratzen diona, ariketa guztiak egiteko denbora ematea da. Irakasle liburua goitik behera errespetatzen saiatzen da, bertako ariketa guztiak eginez.
Lehen aipatu bezala, oso maila ezberdinak daude gela honetan, orduan normala denez batzuk oso azkar egiten dituzte proposatutako ariketak eta beste batzuk askoz ere denbora gehiago behar dute lehenengo ariketarekin amaitzeko. Orduan irakasleak, ostiral arratsaldeak bukatu gabeko ariketa horiek bukatzeko denbora uzten du, eta lanak bukatuta dituena lasai asko parkera irten dezake.
Ikasle bat gaizki portatzen bada, normalean pentsatzeko txokora joaten da baina beste batzuetan zigortuta geratzen da arratsaldeko klaseak amaitu ondoren.
Bestalde ikasleen gurasoekin oso tratu zuzena du, bai goizean eta bai arratsaldean parkera ateratzen da ikasleekin gurasoei gauzaren bat komentatzeko. Agian, borroka bat egon bada, karpeta ahaztu bazaio norbaiti, mina hartu badu…
Ikasle bereziei ere tratu normala ematen die, ez sentitzeko baztertuta baina era berean behar duten laguntza osoa eskainiz. Irakaslea gelara etortzen da, eta ez da nire garaian bezala beste gela batera joaten, ez bada kasu berezietan (adibidez oso aztoratuta badago eta ondokoari eragozten badio). Irakaslea asko saiatzen da bestalde, ikasle bereziak egin behar duen lana besteenarekin oso lotuta egoten.
Inoiz ez die ikasleei ahotsa altxatzen eta hauek asko maite dute andereño Arantxa.
Ikaste-irakaste prozesua:
Gelako dinamikan ageri den ikaste-irakaste prozesua oso errepikakorra eta errutinarra da.
Lehenengo, goizero bezala, megafoniatik erlaxatzeko sintonia jartzen dute (9:05, gelara iritsi eta gauza guztiak bere tokian utzita dutela). Lasaitasunezko minutu hauetan, begiak itxita eta ondo eserita daudela, paradisuko toki bat imajinatzen dute. Honen ondoren, data arbelean idazten dute eta gero “Txiste, iragarkizun eta jolas kantak” liburuko orrialde bat irakurtzen dute. Honen ondoren dagokion klasearekin jarraitzen dute. Nahiz eta klase ezberdinak izan (gaztelania, ingelera, txanela edo matematika) normalean fitxak egiten dituzte. Orduan, ikasleak ez daude motibatuta, eta egunen batean irakasleak bideo bat edo ikusteko esaten badie asko pozten dira.
Hala ere, IHPko konpromezuak nahiko ondo betetzen dituzte. Ariketak aurrezagutzetatik abiatzen dira, ikasitakoa baliagarria da eta errealitatean kokatua; esaterako oraingo gaia unibertsoarekin lotuta dago eta datorrena lanbideen eta inauterien ingurukoa da. Gainera, denek elkar errespetatzen dute eta berdintasuna bultzatzen dute egindako ariketak; bistakotik hasita marrazkiz josita dauden liburu eta fitxa hauetan elbarrituak, etorkinak, neska edo mutilak maila berean ikus ditzakegu. Talde lana asko bultzatzen du irakasleak horrez gain.

Nola jokatuko nuke irakaslea izango banintz?:
Lehenik eta behin, ni irakaslea banintz ikasleak gehiago motibatuak izaten saiatuko nintzen. Gaiarekin lotuta noski baietz gauza praktiko gehiago. Laborategian gauzak eginez, ordu bete oso mahaian geldirik ez egoten, kalera ateratzen, bideoak ikusten, abestiak entzuten, ordenagailurako programa ezberdinak erabiliz…
Bestalde, zuzenketak beste modu batera egingo nituzke. Irakasleak, akatsak boligrafo gorriz zuzentzen ditu; nik ordea, borratu egingo nuke gaizki dagoena eta berriz egiteko eskatu. Honelako zuzenketetatik larriena, irakasleak azalpenak ez dizkiela ematen da. Nik berriz, azalpenak emango nizkien, eta horrela ziurtatu ondo ulertu dutela.
Zer aldatuko nuke?:
Egia esateko gelaren antolaketa, irakaslearen mahaia arbelaren aurrean kokatuko nuke, eta ez lehen esan dudan bezala leihoaren aurrean; zeren eta bestela irakasleari begiratzen hari diren bitartean parkean zer gertatzen hari den ikusten daude, aditasun faltaren adierazle nagusitako bat.
Horrez gain, metodologia eraikitzaileago bat. Nahiz eta mailako liburuak izan hauei beste erabilpen bat eman, txanela proiektuarekin ikaskuntza ere eraikitzailea izan badaiteke eta. Esaterako, ez nuke irakasle liburuan dioena puntu eta koma guztiekin errespetatuko, bideoak, bidaiaren bat (nahiz eta ondoko parkera izan), gela aldaketak, esperimentuak… lehen aipatu bezala, jarrera positiboago bat sortzeko ikasleengan.

beste bat photofunian!

beste xelebrekerik!!

hau errazagoa da egiteko www.photofunia.com-en sartu eta salseatu!

antza ba al dute ala ez?